Эвэн дукамҥаван дьоондьидьак

ИЛКЭН. «Баргачан-эвэды поэзия һаньинни» гэрбэлкэн книга презентациян дьонтумҥаду, прозаикту, һупкучилдывулбу дукникан, ньөвчэду Василий Спиридонович Кейметинов-Баргачанду аанипти Ҥунмирэл гиамачинтан дьуудун бисин һэйэ 21 инэҥидун.

Книга ааҥан Василий Спиридонович бинин һэбдьэнь, дукамҥа одаҥан профессиональнай һоотарман. Мероприятиетки һөлнэчэл дуусач ээримкэтитэн ноҥан педагогикала, литературала, культурала-да һойав иивдэҥмэн, төөрэнни ибдьиривэн, таланни анҥамта мудман ааҥаритан. Һаанилни, гианилни, һааракални ньамсич ноҥман дьоонитан. Профессиональнай артиһал, мэндьур мээнкэн ньөөддил икэмҥэл-дэ һисэчим һаниритан ай икэлдьур. Эчин оочатан эвэн Һоони бэиҥмэн дьоҥчидьактакан эникэн бис, Ньока төөрэҥэн Иҥэньгидэ буган культураван һэрвиҥтэрилду бэкэтьтут эливун өруси һэбдьэк бисин.

Книгав ньөөдэн һидутникэн итагрин Василий Спиридонович-Баргачан айаври асиҥан, гиан Александра Давыдовна Кейметинова. Александра Давыдовна текэрлэн эвэн төөрэмэн, литератураван-да Тополиндула куҥалду һупкучэддэн. Изданиев ньөөвдэтэн тамаҥан Баргачан көтлэҥэн һунадьан Ольга Васильевна Ултургашева, Манчестер университетан профессоран нээрин.

Василий Спиридонович дигэн төөрэм һаари бисин: эвэдив, ньокадив, ньуучидив, английскаю, амаргагу укал һаҕдынидьи һупкуттин. Ноҥан һойа төөртэндук һааракалкан, гианилкан бисин, тиэми книган тарал гианилни төөрэрдьитэн ньөөрин, дээмҥэ ли таҥамҥалду һэбдьэн бидьин.

Дукран Ирина Курилова, тулматтан Зоя Степанова.

И.Курилова фотолни