Арктика асални Турцияв ҥаллавур гара

ИЛКЭН. Эвэнки икэмҥэн Галина Веретнова ньан режиссёр Мила Кудряшова документальнай фильмэв Арктика асални дьугулитэн Турция илан городолдулан ичукэнэ: Стамбулла, Аланияла ньан Анталияла. Һэйэ биаҕан 10-дукун 16-дулэн истала дигэрэкэн ичукэнэ Ньока төрэҥэн культураньунни көйэчимҥэлбу һаамулкувкана.

Турнев мудакра Москвала биси ҥунмирэл ээлгэлитэн гургэвчири һупкучэкту Анталияду, эду һупкуттил һаалра һопкилдукут эмэпчэлбу даватьми айбан, иҥэньгидэ буг нунмирэлни асални кульурали һойав оннаватан.

Режиссёр Мила Кудряшова Санкт-Петербургдук һөллөти фильмэлни һопкигатан ииритэн иҥэнь буггидала бисил асал бадатан, ноҥартан бинидукутэн-дэ. Эливун героилдьи биситэн-бутун российскай иэсчимэчэкту «Арктика асин дылганни» гэрбэ, Медиапроект доолин бичэлэ: Галина Веретнова, Констанция Петрова, Нарияна Ренанто, Туяра Жиркова, Варвара Степанова. Фильм илан документальнай новеллалдук бисин: «Констанция Тянадук», «Удаганкал», «Ёхорьё». Иҥэнь бугу давачаддил асал укчэннэ, иасуматта мэнҥидьур бинилдьур, иав оодаҥдьур, ҥунмир оонмаилдьин, томалбур, муһалньун укчэнмэчиҥкэлбур ааҥаритан. Асал һөнтэкил. Ноҥартан биниливур ҥэнрэ, һопкилбур дьоҥчиникан, эникэн омнар. Ноҥардукутан өмэтэл аси-ҥунмирур ииндьидди ньэкэнмэйтэкин һоотумҥал.

Туллматтан Зоя Степанова