Ньока төөрэҥнэн орам иргэчинду 2025 анҥаниду иав алаттан

ИЛКЭН. Эрэк анҥаниду регион доолин Минсельхоз дьуличчэдьин оранти таҥунни 8,5 проценач һойалбуннан 175,8 тысячала истала. Орандук гаридьур оникан ньөвритэн продукцияҥат дьөөрдидьин эгдьэлбудьин – анҥанила 1200 тоннала истала.

Тачин бидэн ҥуунэмэттил бэгэһэл 2028 анҥанила истала ньуҥэн орам маапти цеху иивдэвур мулгатта. Ньан оран оҥкари төөрбэн хозяйствалду һорукандавур ньэкэннэтэн. Тиикэрэпту оран оҥкайрин төөрэл (дэтҥилдук һөнтэн) оралчимҥалду эчэ һорупта. Тарал һиги фондан төөрэҥэлдьин таҥучивадда, Россия итулдьитан көйэчивэддэ.

Тарбач ньан аавдачимур нээннэт, дьуганиду куҥалбу домҥэтки стадалтаки ичин һөруннэвур, боланиду амаски эмуннэвур, нөсэҕчэр оралчимҥал абалбутан, оран куреван, тэгэтти дьуугатан одай ээрипчи оодаҥман, дьуу орман буйун һэсэнни һөтуснивэн отрасльу тамаман һойалтадавур.

Дьомканакат республикаҥнат анҥантан орам иргэчиндун 1-миллиард тамаҥган бөбгэрэчэ. 1014 хозяйствола 1245 бэил гургэвчиддэ, таралдук 1010-нни көсчимҥэл, 235-нни чум гургэвчимҥэлни.

Дукран Валенин Хоту

Тулматтан Зоя Степанова