Чукоткала анҥани юкагир төөрэндун ааньибдьин
ИЛКЭН. Эври миир гиа инэҥидун Дьооҥчидьак дулаҕ дьуудун “Наследие Чукотки” гэрбэлкэндулэ Анадырьла бакалдамачак бисин юкагиралду ааньипти-Чукоткала дьулэптукун ииндьиддил ҥунмирэлдук гиадмардунтан. Ньока төөрэҥэн юкагирални ньан тартики онлайндули ньөөритэн.
Бакалдадьакла ҥэнчэл һаамулкуритан юкагирал титэрэп культуравутан. Укчэнмэтитэн ньан дьулгидэлэ балданҥа төөрэн Окружной фестивальбан оодавур, юкагир-да төөрэмэн элэ иивникэн. Эрэк биннэн 2025 анҥаниду Чукотка автономнай округлан.
Вячеслав Шадрин, Ирина Курилова, Валентина Акимова, Макар Курилов иасуматитан эрэк проекалду ноҥартан иав иивэннэвур. Эрэв нэлкэнив омолон юкагиралтакин экспедиция биннэвэн илуритан. Билибин районни Омолон билэклэн тала ииндьиддил клубу ааҥаритан балданҥа төөрэмур һупкуттэвур. Дьулэски гургэлэтэн фестиваль биннэн юкагир культуралин ньан национальнай эвиндулитэн. Ассоциациятан, һааҕдыҥалтан Советан-да гургэвчимҥэлни, балданҥа төөрэн һупкучимҥэлньунни омолон активисталбан һупкуччир. Ноҥартакитан мултуритан юкагирал дьугулитэн литературав, төөрэрукэлбу, укчэнмэчиҥэлбу-дэ. Эври миир 21-дун Ҥунмирэл ээлгэлитэн биси балданҥа төөрэн инэҥидун Анадырьла ааҥадьир юкагир төөрэнни Анҥаниҥман Чукотка автономнай округтун биннэв. Чукотка администрациян ээричэдьин тартаки һөллөччин Макар Курилов, юкагир ҥунмирэҥэн һаҕдыҥални Советан ҥунэмэчимҥэн. Һоо һэбдьэнь Анадырь юкагирал бугатан бидэҥэн. Өтэл элэ юкагирал ииндьиддитэн, город илаттин-дэмэр окатноҥартан Онадырач гэрбутитэн (“ану-ан” төөрэндук), юкагир төөрэндьин “окат” гэрбэ. Нонан элэ эмчэл казакал, окатту острогу илуридьур. Анадырьскайдьи гэрбуритэн.
2020 анҥаниду бичэ дукунду (переписьту) юкагирал таҥунтан Чукоткала 152 бэй бичэ (2010 анҥаниду дукуттидьин 198 юкагир таҥучивча).
Ирина Курилова дукран
Тулматтан Зоя Степанова
Фото: Музейный Центр «Наследие Чукотки»
Читайте также:
Фольклорно-лингвистическая экспедиция к тундренным юкагирам
Анна Васильевна Курилова и её песни: взгляд в прошлое юкагирского народа
Юкагиры о космосе и небесных светилах
