Оран улрэвэн эливун столицалдула һойат һаратти оочал

ИЛКЭН. Ямало – Ненецкай автономнай округ ньан Коми республикан экспертални укчэннэ «Москвады газета»  долин эрэк регионалдула орам иргэчиндули дьулэски ҥэнэддивэтэн.

ЯНАОла политикали, экономикали-да коммуникациян Агенствон гургэвчимҥэн, политолог Сергей Зубанов эрэв мэдукэнни. Ноҥан илкэнин регион дьуу оранни таҥундулин нонапла бисивэн. Анҥантан оран улрэвэн гаритан исуддэн, тарав һупкучэкэлдулэ, куҥав иргэчиҥкэ дьуулдулан бөөврэчэл. Россия һөнтэ-дэ регионалтакитан һөруврэчэл. Санкция дьулдэлэн Ямал оранни улрэвэн Германия, Финляндия-да һойач гари бичэл, бэйдьур оран улрэҥэлкэн-дэ бисиклэвур. Китай-дэмэн Ньока төөрэҥдукун. Горими һиэпту Арктикаҥдукун оран нанраван, таҥньаван-да һараткарачал, тадук бэгу ооврачал.

Орам иргэттэ Ямалла ненцал, селькупал-да. Ненцалдула бис өмэтэл бэйҥитэн-дэ, дьулэп совхозла бичэвчин-дэ чакутта. Ноҥардутан бэлрэн агропромышленай комплекс департаменни. Гиавану региондула оран улрэвэн һараттитан ээрин өгэрэптин. Дьуллэ ненцал нанрав, кокчилбу, икиридук- тэ һилу ириттэвур амаски гасчивраритан,  тарав этил бөөр биситэн, тиик-дэмэр чэлэвэн амаски мучувра, бэил амаски мучувдаҥматан бэйдьур дьэблэҥэттэ һөнтэлду-дэ уньир. Скупщикал бис, ненцалдук һаараттидьур, продукциявутан валютали Китайла уньирил.

Коми республикалан-да орам иргэчиндули ньан дьулэски ҥэннэн, тарав укчэннэн политолог Сергей Понамарёв. Ормур һигридьур, тээвэмҥэл улрэҥур бэкэтькэмэн Москвала, Санкт-Петербургла уньиврэр.

Коми республикалан оран улрэвэн, дьулэпньун тэрэмкэми, тээвэмҥэлдук гаритан адыкулбун. Дьуллэ тачикан билгурач оран улрэвэн гадавур этил гуусэкрэ биситэн, тачин галдаҥатан оодаҥан дьөөр анҥани иэлтэнни. Эрэк оран улрэн диетическэй, деликатес бисивэн мэддитэн. Комила оран улрэн килограмман харачинмай ээрин 300-400 рубль, Москвала-дэмэр – 1000 рубль, һаадун-да 5000 рубль биврэчэ. Тээвэмҥэл  Коми республикалан свинья улрэн ээридьин һараттидьур, столицала-дэмэр адыракан-да ээридмэрду унивэттэ. Тарбач тээвэмҥэл Комила абалал оочал, тиик тарал таҥунтан 2-3. Тар биникэн регион доолан, һодмар кирҥидалан городалдула Ухтала, Интела. Воркутала оран улрэн һодмар дьэбэбгэрэн, һөнтэ дьэлгэнкэл улрэньунтэн тэрэмкэми. Оран улрэвэн оралчиҥалдук-ньун  һаараччир. Таритрегиондула иҥэкчэ свинья, һөкэн улрэлни орҥидук эрэгэр ээрипчи бидир.

Долчилда:

Тулматтан Зоя Степанова

Читайте также:

Плановые показатели не выполнены. Но не все так плохо