Якутскайла балданҥа төөрэмур һөлбучэддилбу эскэр

13.02.2025

Анҥамта укчэнэкэл

Якутскайла балданҥа төөрэмур һөлбучэддилбу эскэр

252

ИЛКЭН. Якутскайла һоопчаникан дьавукана Ньока төөрэҥэн ҥунэмэтти бэгэнни премиялбан балданҥа төөрэр эдэтэн бэриптэ тарав дьулэски ҥэнудэвур мандучаддилду.

Эври мир 13 инэҥидун Опера балет театрдун эгдьэн мероприятие иэлтэнин Ньока төөрэҥнэн Балданҥа төөрэнду, дукунду-да ааньипти: Эрэк инэҥиду эскэритэн балданҥа төөрэн ииндьиддэн дьулэски-дэ ҥэнудэвур киҥкич гургэвчидди бэиҥэлдур. Премия лауреаталдьин ооритан Иҥэньгидэ буг адыкун таҥулкасални ҥунмирэлдукутэн бэил.

Николай Иванович Спиридонов – Тэки Одулок гэрбэдьин премияв юкагир төөрэмэн һөлбучэддиду ҥэн ҥаалалкан һаҥанамҥаду Мария Николаевна Куриловаду дьавуканитан.

Василий Дмитриевич Лебедев гэрбэдьин премияв эвэди төөрэми, ҥунмирэҥи культураван-да дьавачиддиду, “һээдьэ” көплэчим ҥэнумҥэду, Ньока төөрэҥэн һупкучиндули заслуженнайды гургэвчимҥэдун “Эньин медалан” гиадмар степенни, “Ньока төөрэҥэн һупкучимҥэлни һупкучимҥэтэн”, Кусинду бакуча куҥал” гэрбэл тиҥэнди һоручиҥка илкэр һунҥидутан Анна Дмитриевна Слепцоваду бөөритэн.

Глафира Макарьевна Василевич гэрбэдьин премияв гадни эвэнки төөрэмэн, культураван-да һөлбучэдди иҥэньгидэ филология федеральнайды государственнай бюджетнай наука учреждениен “ИГИ ПМНС Россия академиян наукан”, филологическайды наука кандидатан Мария Петровна Дьяконова.

Балданҥа төөрэн, дукун-да инэҥиҥэн Ньока төөрэҥнэн эври мир 13 инэҥидун илкэбдэн илурин Михаил Николаевич таракам Ньока төөрэҥэн ҥунэмэтти бэгэнни бичэ эври мир 9 инэҥидун 1996 анҥаниду. Эрэк инэҥиду бакурин Семён Андреевич Новгородов, ньокалдук нонап лингвист-учёнай, ҥээрим эмучэ ҥунмирэҥди, ҥидук-тэ нонан дукум һулбимкэнчэ бэй.

Эррөсин премия балданҥа төөрэрбу иимкэндэтэн, тарав һупкуттэтэн дьулэски ҥэнудэтэн бөөбгэрэн Ньока төөрэҥэн Президенни эври мир 12 инэҥидун 2013 анҥаниду ньунчэдьин №1870 “Төөрэндули политикав айҥурин” гэрбэлкэн.

Лауреаталбу һоокамкаттап, дуусач төөҥкэривур мэдукэнэп ноҥартан ач тамна гургэтэн дьугулин ньан Ньока төөрэҥэн ҥунмирэлни балданҥа төөрэмутэн иимкэндэвур мандутникан гуусэкэддилбу.