Великтон Прокопьев: эвэнки төөрэмэн иимкэнтики һотаран интернетли һупкутникэн

ИЛКЭН. Эвэнки төөрэнни таҥуттан бэрибэдди төөрэр долатан. Анҥантаан төөрэри төрэри бэй адыкулбун. Тар биникэн төөрэвкэндэвур мандуттил бэил бис, тарак дьугудун киҥкич гургэвчиддил. Тарбачан бэилдук гиадмаратан бисни Великтон Дмитриевич Прокопьев-Алдан улусан Хатыстыыр билэктукун эвэнки бэиҥэн, төөрэми һаадай 50 анҥанидукуй һупкучилчэ.

Ноҥан тачин ньэктэҥэн ньунуттэн, һаҕдыдукуй эникэн һээттэ, һупкучилми бэй этҥэвэн ньаадур (амандар). Эчин бидэн тэгурин бугинук эмчэ һупкучимҥэ Наталья Юрьевна Ушницкая, һупкучэк доолин һааҕдылду курсы ааҥаридьи. Ноҥан һөрчэлэн Великтон Дмитриевич мукаиллин төөрэми һаари бэй билэклэ аччадукун.

Хатыстыырла ииндьиддэ эвэнкил гиаки һаанилтан. Дьулдэлэ эвэнкидит ньока төөрэньунни дэлтэ төөрэрил биситэн.

“Куҥарапти долдаврарив упэньилбу укчэнмэчэддивутэн, ньимкэҥэлти гөөҥнэритэн, мут-дэмэр куҥал этил аавдатта бисит тарав. Асиҥу эньинни Христина Григорьевна, упэн-дэ балданҥа төөрэндьур укчэнмэткэрэритэн, асиҥу-да бэйдьи һаари бисин. Тиикэрэплэ Хатыстыырла төөрэрил эчэл һулаапта”, — мэргэттэн Великтон Дмитриевич.

Тар биникэн ноҥан эсни дабдар мээндьи мэнкэн төөрэми һупкучидьилрэн, книгалбу таҥникан, аудиодук долсиникан. Һоч айаврин, аидмарач таҥуттидьин Трофимовту ньимҥакнни оорин, ноҥандун төөрэми һаалдан бэлри дьулээски һидутти.

Великтон һунадьан Валерия мунакрин СВФУ филологияли факультетбан иҥэньгидэ һааниван. Тиик эвэнки төөрэнни һупкучимҥэдьин гургэвчин 38-ки һупкучэкту Якутск городла. Эрэк ичукэттэн төөрэми айван, амтилдук уйулдутникэн, һурэлтэки ҥэннивэн.

“һунадьу һупкучэкту предметал чэлэлитэн аит һупкуттин. Ноҥан эвэнки төөрэнни һупкучимҥэн оодан би эчу һидуттэ бэйдьи мээнкэн һинмарин. Тарбач ньан ноҥан английскай төөрэн һупкучимҥэн”, — укчэннэн Прокопьев.

Тикэрэп һээду технология эҥидун Великтон Дмитриевич ичин төөрэми иимкэндэй, дьулэски ҥэнудэй бакран. Олукааду ватсап-группав бакран эвэнки төөрэмэн илэ һупкучиддилбу, тала иирин тарит. Тиик-дэмэр ноҥан һойа группалдула бисни, гиаки темалдули укчэнмэттилдулэ, мээндьи-дэ һааридьи иасуматтан тали. Мээнҥигэй группагай ньан ааҥарин тала 29 бэиҥэлкэн республика гиаки төөрдукун. Ноҥартан дукунач укчэнмэттэ, аудиола дуккотта тулматтаҥур икээлбу, дьонтуралбу.

Великтон Дмитриевич ньэкэддин ичукэттэн өмэккэн-дэ бими бэй төөрэми иимкэндэй эгдьэм гургэв ооннаван. Тачин ноҥан һөнтэлбу бэилбу бодуттан ноҥгичинни ньэктэтэн, төөрэмур миалукандавур, иимкэндэвур, дьулээски-дэ ҥэнуддэвур.

Дукран Ирина Спиридонова, тулматтан Зоя Степанова

Читайте также:

Мессенджеры как инструмент сохранения родных языков народов Севера