Ил Дархан анал истипиэндьийэтин ылла
Дьокуускайга сэтинньи ый 25-гэр, Олоҥхо күнүнэн Ил Дархан Айсен Николаев олоҥхону толорооччуларга, оһуокай тылын этээччилэргэ, тимир уустарыгар уонна норуот маастардарыгар анал истипиэндьийэтин туттарда.
Ил Дархан бу анал истипиэндьийэтэ 2022 сылга бигэргэммитэ, онтон ыла сылын аайы куонкурс түмүгүнэн 25 талба талааннаахтар талыллан истипиэндьийэҕэ тиксэллэр. Барыта үс сыл иһигэр 30 тыһынча солкуобай сууммалаах истипиэндьийэни 81 киһи ылбыт.
Быйылгы стипендиат-оһуохайдьыттар истэригэр биһиги биир дойдулаахпыт, Саха Өрөспүүбүлүкэ культуратын үтүөлээх үлэһитэ, Усуйаана улууһун бочуоттаах олохтооҕо, Дьокуускай куоракка Усуйаана улууһун түмсүүтүн салайааччыта Абрамова Ирина Васильевна баара, кини бу ситиһиитэ барыбытын үөртэ.
Ирина Васильевна эдэр сааһыттан «Оһуохай» уопсастыба биир көхтөөх чилиэнинэн, 2019 сылтан бэрэссэдээтэли солбуйааччынан, өрөбүл ахсын буолар Оһуохайы тэрийээччинэн үлэлиир. Ирина Абрамова СӨ «Оһуохай» түмсүүтүн 37 сыл устата сатабыллаахтык уонна таһаарыылаахтык салайан кэллэ. Онон кини Сахабыт сиригэр оһуохай сайдарыгар сүдү кылааттаах, дуһаатынан бэриниилээх киһи буолар. Быйыл Ил Дархан киниэхэ анал истипиэндьийэ туттарбыта, Ирина Васильевна улахан үлэтин сыанабылын мэктиэтэ буолар.
Ирина Васильевна Абрамованы итиитик-истиҥник эҕэрдэлиибит! Эн сыралаах үлэҥ өрүү сыаналана, үрдүктэн үрдүк ситиһиилэнэ турдун!
Бэлэмнээтэ Надежда Петрова
