“Дыгын оонньууларын” бастакы сүүмэрдиир түһүмэҕин түмүктэрэ

Кэлэр сайын Улуу Туймаада уйгу-тунах ыһыаҕар ыытыллыахтаах “Дыгын оонньууларыгар” 1-кы сүүмэрдээһин күрэхтэһии ахсынньы 24-25 күннэригэр Дьокуускайга “Триумф” успуорт уораҕайыгар үрдүк тэрээһиннээхтик ыытылынна. Күрэххэ 58 уоланнар ким ордук күүстээх бэлэмнээҕин быһаарыстылар.

“Дыгын оонньуулара” кэлэр сылга саҥа систиэмэнэн ыытыллыа. Ол курдук, аны 12 буолбакка, 16 боотурдар хайалара бастыҥын быһаарсыахтара. Сүрүн бириистэри -муҥутуур кыайыылаахха “Прогресс” ХЭТ (ген. Дириэктэр Алексей Пинигин) 3 000 000 солкуобайы уонна Евгений Григорьев баһылыктаах Дьокуускай куорат дьаһалтата “УАЗ-Патриот” туруоруохтара.

“Спорт Якутии” саайтка Саха многоборьетын Федерациятын толорооччу дириэктэрэ, “Дыгын оонньууларын” сэттэ төгүллээх Аан Дархана Иван Белолюбскай санаатын үллэһиннэ:

Күрэхтэһиилэр тыҥааһыннара, күүрээннэрэ үрдүк. Боотурдар тупсан, көрдөрүүлэрэ үрдээн иһэр. “3х3” атах оонньуутугар 33 м ыстаммытттар, “Тутумҥа” 64 эргийбиттэр, 400 м сүүрүүгэ 53 сөк кэлбиттэр үс иһигэр киирбэтилэр. Ити сайдыы көстүүтэ. Хамсааһын төрүөтэ – “Дыгын оонньууларын” таһыма үрдээһинигэр. Уолаттар бэлэмнэрэ үчүгэй буолан, дьаныһан туран туруулаһаллар. Дьон сэҥээрэр, биһириир, геройдары билэллэр. Киһи хараҕа таптыы көрөр эдэр, саҥа ааттар бааллара үөрдэр, күүс өттүнэн маска, тааска сабырыйтараллар. Дьарыктарын салҕаатахтарына, бууттарын этэ бустаҕына, систэрин этэ ситтэҕинэ боотурдар тахсаллара саарбахтаммат.

Кыттааччылар географиялара кэҥээн иһэр. Хоту улуустартан, Анаабыртан тиийэ бааллар. Ити ыччаттар ортолоругар интэриэс күүһүрэн иһэрин бэлиэтэ.

Уолаттар сүүмэрдээһин үс түһүмэхтэрин тухары кытталлар. Көтүтүөхтэрин да сөп. Ону спортсмен бэйэтэ быһаарар. Хааччах суох. Тренер үлэтиттэн эмиэ тутулуктаах. Турнир аайы бэйэҕин ыгар буоллаххына, сылайыы баар буолуон эмиэ сөп. Ол иһин, толкуйдаан, спортсмен туругуттан көрөн кыттыахтара, кытыннарыахтара. Үчүгэй бэлэмнээхтэр 15 иһигэр холкутук сылдьыахтарын сөп. Утарсааччыны үөрэтии, утумнаах дьарык, “интрига”, күөнтэһии хайаан да баар буолар. Бэйэ бэйэлэрин үөрэтиһэллэр, билсэллэр. Наһаа тэҥнэр. Хайдах бэлэмнэнэллэриттэн улахан тутулуктаах. Билигин бастаан иһэр Николай Матаннанов 50 кыайыы очколаах. Холобур, сүүмэрдээһин биир эмэ түһүмэҕин көтүттэҕинэ ситтэриэн сөп.

Күрэхтэһии түмүктэригэр киирдэххэ, көрүҥнэргэ кыайыылаахтарынан таҕыстылар:

Ыстаҥа 3х3 — Яков Дмитриев (Кэбээйи);

Тутум эргиир — Вячеслав Дьяконов (Нам);

Мас-рестлинг — Николай Матаннанов (Таатта);

Оҕунан ытыы — Владимир Шологонов (Үөһээ-Бүлүү);

400 м сүүрүү — Марсен Колесов (Чурапчы института);

Хапсаҕай — Николай Архипов (Кэбээйи);

Таас көтөҕүү — Дмитрий Петров (Бүлүү).

Уопсай түмүккэ 54 очукуолаах Николай Матаннанов кыайыылааҕынан таҕыста.

Кини  көрдөрүүлэрэ:

Ыстаҥа — 8 миэстэ

Тутум эргиир — 13 миэстэ

Мас-рестлинг — 1 миэстэ

Оҕунан ытыы — 9 миэстэ

Сүүрүү  — 14 миэстэ

Хапсаҕай — 7 миэстэ

Таас көтөҕүү – 2 миэстэ

Иккис миэстэни 20 саастаах Кэбэээйи эдэр боотура  Артем Дьяконов (75 очукуолаах) ылла. Көрүҥнэринэн көрдөрүүлэрэ:

Ыстаҥа — 6 миэстэ

Тутум эргиир — 2 миэстэ

Мас-рестлинг — 30 миэстэ

Оҕунан ытыы — 8 миэстэ

Сүүрүү  — 16 миэстэ

Хапсаҕай — 2 миэстэ

Таас көтөҕүү – 11 миэстэ

Үһүс миэстэҕэ Үөһээ Бүлүүттэн Владимир Шологонов тигистэ. Кини көрдөрүүлэрэ:

Ыстаҥа — 18 миэстэ

Тутум эргиир — 14 миэстэ

Мас-рестлинг — 7 миэстэ

Оҕунан ытыы — 1 миэстэ

Сүүрүү  — 4 миэстэ

Хапсаҕай — 21 миэстэ

Таас көтөҕүү – 13 миэстэ.

Балаһыанньа быһыытынан кыайыылаах 50 рейтинговай бааллары ылар, иккис миэстэлээх – 48 баалы, үһүс – 46, төрдүс – 45 уонна салгыы ити курдук кыччаан иһэр. Үс сүүмэрдиир түһүмэх түмүгүнэн ордук элбэх бааллаах 15 спортсмен “Дыгын оонньууларыгар” кыттар быраабы ылаллар. Даҕатан эттэххэ, Дьулустаан Ноговицын быйылгы Оонньуулар кыайылаахтара буоларын быһыытынан путевкалаах.

“Дыгын оонньууларыгар” сүүмэрдээһин иккис түһүмэҕэ олунньу 1-2 күннэригэр Бороҕоҥҥо, үһүс түһүмэх муус устар  12-13 күннэригэр Чурапчыга ыытыллыахтара.

Хаартыска: “Спорт Якутии”