Эбээннэр съезтэригэр

Бу дьыл ахсынньы 6-7 күннэригэр Дьокуускай куоракка Арассыыйа эбээннэрин VI съеһэ, ахсынньы 10-11 күннэригэр Саха Сирин эбээннэрин VI съезтэрэ буолан аастылар.
Муоматтан делегаттарынан Арассыыйа эбээннэрин съеһигэр норуот маастара, бэйиэт, ырыа айааччы, һээдьэһит Садовникова Зоя Степановнаны кытта мин сырыттыбыт. Ол иһигэр съезкэ Улахан Чыыстайдааҕы аҕыйах ахсааннаах норуоттарын ассоциацияларын бэрэссэдээтэлэ Еремей Садовников, «Дабдука» (Кыайыылаах) култуурунай нэһилиэстибэни үйэтитэр олохтоох общественнай тэрилтэ салайааччыта Анфиса Прокопьева кыттыыны ыллылар. Ону сэргэ Саха Сирин Арктикатын уонна Хотугу дойду норуоттарын сайдыытын миниистирин солбуйааччыта Михаил Погодаев анал ыҥырыытынан «Һонҥачаан» эбээн оҕо фольклорнай ансаамбыла (сал. Тарков А.А.), «Һээку» эбээн норуодунай фольклорнай ансаамбыла (сал. Корякина С.Е.), Дьиэ кэргэн сылын чэрчитинэн ыытыллыбыт «Бастыҥ дьиэ кэргэн» Арассыыйатааҕы куонкурус «Төрүт үгэстэри үйэтитээччи» (Хранители традиций) анал аат хаһаайыннара Елена Степановна, Василий Викторович Соловьевтар элбэх оҕолоох дьиэ кэргэн буолан Арассыыйа эбээннэрин VI съеһигэр ситиһиилээхтик кыттыннылар.

Съезкэ Чукоткаттан, Хабаровскай кыраайтан, Магадаан уобалаһыттан, Санкт-Петербургтан, Усуйаана, Томпо, Эбээн-Бытантай, Кэбээйи, Абый, Орто Халыма, Чокуурдаах, Өймөкөөн, улуустарыттан делегациялар кэлэн кытыннылар. Атын эрэгийиэннэр эбээннэрэ хайдах дьаһанан олороллорун, тылларын, култуураларын сайыннаралларын иһиттибит. Эбээн норуотун билиҥҥитин «Аҕыйах ахсааннаах омуктар төрүт дьарыктарын сайдыыта» тиэмэнэн төгүрүк остуолга киэҥ кэпсэтии барда.

Арассыыйа эбээннэрин съеһин чэрчитинэн төрүт аһы астыырга «Муус Хайа» рестораҥҥа мастер-кылаас ыытылынна. Манна таба бүөрүттэн, быарыттан, иһиттэн араас минньигэс бүлүүдэлэри астаан көрдөрдүбүт. Биир дойдулаахпыт Светлана Егоровна эрдэҕэһи буһаран сиэдэрэйдик киэргэтэн биһиэхэ күүс-көмө буолла. «Тоҥ балык» күрэххэ Анфиса Семеновна Василий Викторовичтыын кытыннылар. Арассыыйа эбээннэрин VII съеһэ аны 4 сылынан Чукоткаҕа ыытыллар буолла.

Саха сирин эбээннэрин съеһигэр «Хотугу омуктар төрүт олохторун инники сайдыытын уобараһа» диэн стратегическай сессияҕа кэккэ боппуруостар дьүүлгэ турдулар. Эбээн тыла, каадыр, хамнас, общиналар сирдэрэ, Арктика олохтоохторун кэскилэ, араас култуурунай, спортивнай тэрээһиннэр тустарынан инникилээх этиилэри ырытыһыы буолла. Соторутааҕыта Саха Сирин эбээннэрин сойууһун өр кэмҥэ салайан кэлбит Степанов А.П. соһумардык суох буолбутун түмүгэр саҥа бэрэссэдээтэли таллыбыт. Союз солбуйааччытынан үлэлээбит Сэбээн-Күөлтэн төрүттээх СВФУ преподавателэ Кривошапкина Екатерина Афанасьевна бу дуоһунаска талылынна, солбуйааччынан биһиги биир дойдулаахпыт Чичигинаров Егор Владимирович буолла.

«Дуннэдув» («Земле моей») диэн III өрөспүүбүлүкэтээҕи уран тарбахтаах маастардар быыстапкаларыгар Муоматтан Соловьева Е.С., Слепцова И.С., Таркова Р.С., Слепцова Н.Г., Садовникова З.С. тикпит таҥастарын көрдөрүүгэ таһаардыбыт. «Лучшая сума» диэн күрэххэ Зоя Степановна «Народное признание» номинация кыайыылааҕа буолла. Зоя Степановна эбээн норуотун тылын, култууратын, фольклорун, таҥаһын тарҕатар өр сыллаах айымньылаах үлэтэ биһирэнэн Бочуотунай грамота туттарылынна, «Эхо тундры и тайги» куонкуруска кыттан «За верность наследию предков» диэн дипломунан бэлиэтэннэ. Анфиса Семеновнаҕа төрүт култуураны илдьэ сылдьарын биһирээн «П.А. Степанов-Ламутскай өйдөбүнньүк мэтээлэ» диэн Саха Сирин эбээннэрин Союзтарын түөскэ кэтэр мэтээли туттардылар.

Ити курдук эбээннэр мустан инникини торумнаатыбыт, норуот быһыытынан сүтэн-симэлийэн хаалбат туһугар туох үлэни ыытарбытын дьүүллэстибит.
Съезд култуурунай чааһыгар эрэгийиэн икки ардынааҕы Һээдьэ күрэҕэр Прокопьева А.С. бастакы, Садовникова З.С. иккис миэстэ буоллулар, «Һонҥачаан» ансаамбыл оҕолоро ортолоругар бастаатылар. Оҕолорбут съезд тэрээһиннэригэр барытыгар көхтөөхтүк кыттан, үрдүк биһирэбили ыллылар. Ансаамбыл оҕолоро ахсынньы 11 күнүгэр Москва-Казань «Бүтүн арассыыйатааҕы Үҥкүү Олимпиадата. Казань» III арассыйатааҕы Хореографическай фестиваль-куонкуруска көппүттэрэ. Кинилэр Казань куорат үрдүкү сценатыгар ситиһиилээхтик кыттан бастакы истиэпэннээх лауреат аатын, «Һээку» ансаамбыл солистара Регина Аргунова, Ариан Тарков бастакы истиэпэннээх лауреат аатын ылан кыайыы көтөллөөх дойдуларыгар эргилиннилэр. «Һонҥачаан» ансаамбылы аны сайын Санкт-Петербурга ыытыллар фестивалга ыҥырдылар.

Зульфия Саввина, Оройуоннааҕы аҕыйах ахсааннаах норуоттар ассоциацияларын бэрэссэдээтэлэ

Источник: «Индигир уоттара»