Кыайыы Знамята Аммаҕа кэллэ
Бүгүн, тохсунньу 10 күнүгэр, Амма кыраныыссатыгар Кыайыы Знамятын Мэҥэ Хаҥалас улууһуттан тутар бэлиэ күнэ буолла. Знамя улууспутугар тохсунньу 13 күнүгэр диэри сылдьан баран Уус Майа улууһугар айанныа, диэн «Амма олоҕо» хаһыат суруйар.
Кыайыы Знамята быйыл «Бары бииргэ — Кыайыыга» диэн девизтээх эстэпиэтэтэ өрөспүүбүлүкэбит бары улуустарынан сылдьан баран, ыам ыйыгар Дьокуускай куоракка тиийиэҕэ. Знамяны Амма кыраныыссатыгар сахалартан бастакы Сэбиэскэй Сойуус Геройа Федор Попов төрөөбүт дойдутуттан Баатара нэһилиэгин ыччаттара тутан киллэрдилэр. Кинилэр Знамяны улуустарын баһылыгар Дмитрий Тихоновка туттардылар. Салгыы Знамяны Мэҥэ Хаҥалас улууһуттан Амма улууһун дьокутааттарын Сэбиэтин бэрэссэдээтэлэ Владимир Колосов тутта.
«Кыайыы 80 сылын көрсө үлэбит былырыыҥҥыттан саҕаламмыта. Бу биһиги дойдубут ытык бырааһынньыга бүгүҥҥү күҥҥэ өссө суолталанан турар. Ол курдук националистары утары дойдубут көмүскэлигэр билигин ыытылла турар анал байыаннай дьайыы Кыайыынан түмүктэнэрин туһугар уолаттарбыт хорсуннук кытта сылдьаллар. Онон Кыайыы Знамята өрөспүүбүлүкэ үрдүнэн айана “Бары бииргэ — Кыайыыга” диэн девизтээх ыытылла турара олус суолталаах. Бүгүн биһиги Мэҥэ Хаҥалас улууһуттан туттубут. Салгыы Эмис, Абаҕа, Амма, Болугур, Соморсун, Сулҕаччы, Чапчылҕан, Бөтүҥ нэһилиэктэринэн сылдьыа. Манна сорох нэһилиэктэргэ чугастыы сытар нэһилиэктэр эмиэ кыттыһыахтара. Тэрээһиннэргэ тыыл бэтэрээннэрэ, сэрии сылын оҕолоро, бойобуой дьайыылар кыттыылаахтара, оскуола үөрэнээччилэрэ кыттыыны ылыахтара. Биһиги бойобуой, дойдубутугар Кыайыыны аҕалбыт Кыһыл знамяны өрө көтөҕүллэн, ураты суолта ууран туран көрсөбүт», — диэн улуус дьокутааттарын Сэбиэтин бэрэссэдээтэлэ Владимир Колосов санаатын үллэһиннэ.
Кыайыы Знамятын бастакынан Эмис нэһилиэгэ көрүстэ. Манна ыаллыы сытар Алтан уонна Сатаҕай нэһилиэгиттэн эмиэ кэлэн кыттыыны ыллылар. Е.А . Захарова аатынан култуура дьиэтигэр бу бэлиэ түгэҥҥэ анаммыт үөрүүлээх тэрээһин ыытылынна. Эҕэрдэ тылларын улуус дьокутааттарын Сэбиэтин бэрэссэдээтэлэ Владимир Колосов, улуус бэтэрээннэрин Сэбиэтин бэрэссэдээтэлэ Мария Захарова, Эмис нэһилиэгин баһылыга Прокопий Бубякин, Алтан нэһилиэгин баһылыга Николай Карамзин, Сатаҕай нэһилиэгин баһылыга Алексей Шишигин тириэртилэр. Эҕэрдэ ырыаларын «Чуораанчык» уһуйаан иитиллээччитэ Костя Стручков, Аҕа дойду улуу сэриитин кыттыылааҕа Егор Филиппович Сутаков кыыһа Софья Соловьева толордулар. Түмүккэ саала иһэ барыта сүһүөхтэригэр туран «Тыыннаахтар умнубат сыллара» ырыаны толорбуттара олус долгутуулаах буолла.
Салгыы Знамя Абаҕа нэһилиэгэр, ол кэнниттэн киэһэ Амма уонна Болугур нэһилиэгэр айанныыр.
