«Тымныы полюһа – Өймөкөөн» VI экстремальнай сүүрүү марафона — Арассыыйа таһымнаах

Экстремальнай сүүрүү марафонун  тэрийээччилэрэ — Өймөкөөн улууһун дьаһалтата, «Тымныы полюһа» ХЭУо, « Марафоны Якутии» ХЭУо уонна «Дойду историческай өйдөбүлэ” Мэҥэ бырайыак. Экстрим-марафон дириэктэрэ — Дмитрий Неустроев. Быйыл сүүрүү Аҕа дойду Улуу сэриитигэр Улуу Кыайыы 80 сылыгар, ону тэҥэ Арассыыйа Федерациятыгар Аҕа дойдуну көмүскээччи сылыгар уонна Саха сиригэр Ийэ дойдуну көмүскээччи сылыгар ананар. Кыттааччылар бары аҕаларын, эһэлэрин уонна хос эһэлэрин мэтириэттэрин хаартыскаларын кэтэ сылдьар пуормаларын нүөмэрдэрин кытта суруллуоҕа.

«Тымныы полюһа – Өймөкөөн» VI экстремальнай марафон тэрийээччилэрэ бэлиэтээбиттэринэн, экстремальнай сүүрүү чэрчитинэн хас да дистанция тэриллиэҕэ. Бастакы күҥҥэ 5, 10, 15 уонна 21,1 км, оттон иккис күҥҥэ 42,2 уонна 50 км старттар буолуохтара. Бастакы күн күрэхтэһии Томторго буолар, иккис күнүгэр кыттааччылар сүүрүүнү Томтортон саҕалаан, Өймөкөөҥҥө түмүктүөхтэрэ. Трассаҕа 18-тан 70-гар диэри саастаах  спортсменнар тахсыахтара. Биһиги улууспупуттан марафоҥҥа 15 км дистанцияҕа 62 саастаах Семен Баишев уонна 21.100 км уһуҥҥа 41 саастаах Евгений Кривошапкин кытталлар.

– «Тымныы полюһа – Өймөкөөн» VI экстремальнай марафон култуурунай бырагыраамата кыттааччыларга уонна туристарга эмиэ интэриэһинэй буолуоҕа. Ол курдук, Н.М. Заболоцкай-Чысхаан аатынан Томтордооҕу кыраайы үөрэтэр түмэл үлэһиттэрэ “Өймөкөөн кыыла уонна көтөрө“ уонна “ХIХ үйэҕэ саха норуотун олоҕо уонна култуурата” диэн тиэмэлэргэ экскурсиялары ыытыахтара. Томтор орто оскуолатын иһинэн үлэлиир литературнай-краеведческай түмэл үлэһиттэрэ “ГУЛАГ лааҕырдарыгар сылдьыбыт суруйааччылар олохторо уонна үлэлэрэ” диэн бэсиэдэни оҥоруохтара. Аатырбыт Эбэ хайатын иһигэр баар Тымныыны харайааччы Чысхаан Муус Резиденцията ыалдьыттарга аанын тэлэччи аһыаҕа. Маны тэҥэ экстремальнай туристар Үрэх төрдүгэр тиийэн, саха норуотун духуобунай салайааччыта, бөлүһүөк суруйааччы А.Е. Кулаковскай-Өксөкүлээх Өлөксөй 1924 сыллаахха оҥорторон туруорбут “Салгын кут” сэргэлэрин көрүөхтэрэ-истиэхтэрэ. Марафон кыттыылаахтара Өймөкөөн боруода аттарын иитэр Итегеловтар интернациональнай дьиэ кэргэннэрин сылгы иитэр базатыгар сылдьыахтара. Биллэн турар, экстремальнай туристар Өймөкөөн тоҥмот өйүмэтигэр киирэн, хайаан да сөтүөлүөхтэрэ.

Тамара Васильева ыалдьытымсах дьиэтэ кыһыҥҥы күннэргэ туристарынан толору буоларын улуус олохтоохторо бары билэллэр. Уонна, биллэн турар, марафон кыттааччылара Чысхаантан Тымныы полюһугар Өймөкөөҥҥө сылдьыбыттарын туһунан сэртипикээти үөрүүлээх быһыыга-майгыга тутуохтара.

«Тымныы полюһа – Өймөкөөн» VI экстремальнай марафон чэрчитинэн хас да суолталаах дьыалабыай көрсүһүүлэр буолуохтара. Ол курдук, Н.М. Заболоцкай-Чысхаан аатынан Томтор орто оскуолатыгар сэрии сылларыгар “Аляска-Сибиир” туһаайыынан байыаннай сөмөлүөттэри көтүппүт салгын трассатын үлэтин туһунан Улуу Кыайыы 80 сылыгар анаммыт “төгүрүк остуол” буолуоҕа. Манна учуонайдар, историктар, чинчийээччилэр уонна атын эрэгийиэннэртэн бэрэстэбиитэллэр куйаар ситиминэн кыттыахтара. “Тымныы полюһа” официальнай статуһу ыларга уонна Өймөкөөн улууһун сирин-уотун РФ Арктическай зонатыгар тэҥнииргэ анал мунньах ыытыллыаҕа. Марафон кыттыылаахтара Чурапчытааҕы физическэй култуура уонна успуорт судаарыстыбаннай институтун ректора Иннокентий Готовцевы кытта көрсүөхтэрэ. “Тымныы полюһугар – Өймөкөөҥҥө армрестлинг” (өрүс кытылыгар уһулуччу тымныы температураҕа) документальнай киинэни уһулуохтара, — диэн Аксинья Сивцева бэлиэтээтэ.

Төрдүс сылын марафон генеральнай спонсора уонна бииргэ тэрийээччитэ «Баск» хампаанньа – Арассыыйа экстремальнай көрүҥнэригэр аналлаах табаары оҥорон таһаарааччы буолар. Марафон партнердарыгар өссө өрөспүүбүлүкэ министиэристибэлэрэ, бөдөҥ тэрилтэлэр киирэллэр. Дьэ, онон, доҕоттор, «Тымныы полюһа — Өймөкөөн» VI экстремальнай марафон эһигини күүтэр!

Өймөкөөн улууһун пресс-сулууспата