«Бүгүн тыыннаахпын, сарсын суох да буоларым көҥүл»: Улуу Кыайыы өрөгөйдөөх 80 сылын көрсө саллааттар суруктарыттан

Улуу Кыайыы өрөгөйдөөх 80 сылын көрсө сэрии хонуутугар охтубут саллааттар суруктарын «Саҥа олох» хаһыат бэчээттиир.
Далбаев Лука Прокопьевич
(Кэргэнигэр, оҕолоругар уонна аймахтарыгар ыыппыт суругуттан, 1942 сыл)
«Мин дойдубун санаатахпына санаам тиийбэт ыраах сиригэр кэллим быһыылаах. Билигин Сталинград таһыгар баарбын. Биһиги армиябыт күүстээх, уодаһыннаах утарсыыны оҥорон, өстөөҕү үлтү сынньа турар, биир уллуҥах хаан тохтуута суох бэриллибэт. Миэхэ аны суруйумаҥ, мин бу эһиэхэ тиһэх суругум буолар. Фронт уоттаах сэриититтэн ортохпуна бэйэм суруйуом.
Дьэ, күндү кэргэттэрим, аймахтарым, эһиги хаһан да умнубат буолуҥ. Оо, дьэ, төрөөбүт дойду, бииргэ үөскээбит дьонум-сэргэм ыраатан баран санаатахха наһаа да күндү буолар эбит.
Төрөөбүт дойдуну, бар дьону куруутун истиҥник таптыыр буолуҥ уонна дьон олоҕо-дьаһаҕа көнөрүн иһин охсуһуҥ, хаһан да төрөөбүт дойдуну умнумаҥ..!
Көрсүөххэ диэри, быраһаайдарыҥ».
(Далбаев Л.П. 1942 сыллаахха ахсынньы 24 күнүгэр Сталинград уобалаһыгар Пинскэй оройуоҥҥа сэрии хонуутугар өлбүтэ).
Марков Алексей Иванович
(Нэһилиэгин, колхуоһун салайааччыларыгар ыыппыт суругуттан, 1942 сыл)
«Мин сылдьыым, доруобуйам үчүгэй. Билигин Ленинградскай уобаласка баарбын. Өстөөҕү сэбиэскэй Ийэ дойдуттан ыраастаан баран, төрөөбүт дойдудар этэҥҥэ эргиллэн тиийиэм диэн эрэ саныыбын. Ол эрээри сэрии дьылҕата кытаанах, бүгүн тыыннаахпын, сарсын суох да буоларым көҥүл. Мин Аҕа дойдуну көмүскүүр Улуу сэриигэ өллөхпүнэ да хомойбоппун, төрөөбүт дойдубар ааппын ааттатар оҕолоохпун диэн эрэнэ, астына саныыбын.
Эһиги илиигитин ыга тутабын, көрсүөххэ диэри, быраһаайдарыҥ.
Эһиги табаарыскыт Марков Алексей Иванович».
(Марков А.И. 1943 сыл сэтинньи ыйга Ленинград оборуонатыгар сэриилэһэ сылдьан сураҕа суох сүппүтэ).
Сэмэн ЖЕНДРИНСКЭЙ
Источник: Ulus.Media