Төрөөбүт төрүт тыл күнүгэр Өлөөн Ытык кырдьаҕаһа эҕэрдэ тутта
Быйыл Анна Ивановна Тимофеева 95 сааһын туолбут үбүлүөйдээх кэрэ-бэлиэ түгэнинэн, урут бииргэ үлэлээбит кэллиэгэлэрэ итии-истиҥ эҕэрдэлэрин анаатылар
Анна Ивановна, 1954 сыллаахха “Сардаҥа” хаһыат күн сирин көрүөҕүттэн саҕалаан биэнсийэҕэ тахсыар диэри сырдык сыратын, элбэх күүһүн-уоҕун ууран туран суобастаахтык типографияҕа үлэлээбит Өлөөн оройуонун биир баар-суох бочуоттаах ытык кырдьаҕаһа буолар.
Кини кыһамньылаах кынатын анныттан элбэх хаһыат үлэһиттэрэ алҕанан тахсан, сорохторо, о.э. Дмитриева Светлана Спиридоновна, Павлова Вероника Валерьевна, Ниманов Николай Васильевич билигин да сурутааччыларга анаан кумааҕы ”Сардаҥаны” бэчээттээн таһааран үлэлии-хамныы сылдьаллар.
Ол курдук, бүгүн “Сардаҥа” хаһыат кылаабынай эрэдээктэрэ Дмитрий Скороходкин өр сылларга Анна Ивановналыын бииргэ үлэлээбит кэллиэгэлэрин кытта дьиэтигэр тиийэн истиҥ-иһирэх тылларын анаатылар, сэмэй бэлэх туттардылар.
Ону тэҥэ, үбүлүөйдээх эбээни улуус баһылыгын солбуйааччыта Туйаара Егоровна Павлова уонна социальнай харыстабыл хотуна Туйаара Васильевна Колодезникова тиийэн көрсөн эмиэ бэйэлэрин тэрилтэлэрин уонна бүтүн нэһилиэнньэ аатыттан эҕэрдэлэрин тиэртилэр.
Аарыма эбээ кэлбит ыалдьыттары үөрэ-көтө көрсөн, махталын биллэрэн “Зимняя дорога” диэн А.С. Пушкин хоһоонун өйүттэн ылан ааҕан иһитиннэрдэ.
Анна Ивановна наборщигынан үлэлиирин маннык ахтар:
— …Биллэн туран үлэлииргэ ураты ыарахан этэ. Маһынан оттуллар оһоҕунан үлэлиирбит, ардыгар кыраһыын лаампатын туһанан, шриби талан хаһыаты таһаарарбыт. Дьиэ тымныы буолан кырааската тоҥон, хаһыаты бэчээттээһин хаачыстыбата ардыгар мөлтөх буолааччы (“Хаһыат мин олохпор” 2004 сыллааҕы спецтаһаарыыттан быһа тардыы).
Райком бирикээһин толорон, комсомолка кыыс биир-биэс тылы утары хардарбакка сөбүлэһэн, саҥа билбэт идэтин баһылаан, ньыматын үөрэтэн, бириэмэни кытта тэҥҥэ хаамсан икки үйэҕэ үктэммит дьоллоох ийэ, эбээ, хос эбээ буолан олороруттан биһиги үөрэбит, киэҥ туттабыт.
Ол курдук, ытыктабыллаах Анна Ивановна Тимофееваҕа өссө төгүл хоолдьуктаах бэйэбит хоҥкуйан туран улахан махталбытын уонна эҕэрдэбитин тиэрдэбит!
