Подписка

Ырыа алыптаах күрэх

15.02.2025
Сонуннар

Ырыа алыптаах күрэх

22

Олунньу 4 күнүгэр Индигир нэһилиэгэр Н.А. Брызгалов аатынан орто оскуола уһуйаана  Улуу Кыайыы 80 сылын чэрчитинэн, Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи уонна Муома оройуонугар Дойдуга бэриниилээх, кыайыы сылларыгар аналлаах  «Пою тебе, моя Россия!» оройуоннааҕы ырыа күрэҕин бэрт сонуннук тэрийэн ыытта.

Күрэх балаһыанньатынан педагогтар иитиллээччилэрин кытта бииргэ тахсан, байыаннай тиэмэҕэ ырыа ыллаан иһитиннэрдилэр. Ол курдук, 8 уһуйаантан 11 иитиллээччи, 10 педагог кыттыыны ылла. Куонкуруһу уһуйаан үлэһиттэрэ “Матушка земля” диэн үҥкүүнэн арыйдылар. Салгыы бииртэн-биир ураты талааннаах, кэрэ куоластаах кыттааччылар кэлбит дьон сэҥээриилэрин ыллылар.

Күрэххэ төрөөбүт дойдуга таптал, кыайыы, дойдуга бэриниилээх буолуу тиэмэлэринэн ырыа ылланна. Дьүүллүүр сүбэҕэ үөрэҕирии управлениетын сүрүннүүр исписэлииһэ Клара Кимовна Корякина, оҕо айар дьиэтин дириэктэрэ Татьяна Ивановна Анисимова уонна нэһилиэк ытык бэтэрээнэ Мария Гаврильевна Корякина үлэлээтилэр. Күрэх түмүгүнэн, үһүс истиэпэннээх лауреат аатын Костя Колесов уонна Алена Викторовна Симонова (“Кэнчээри”) ыллылар, иккис истиэпэннээх лауреат — Артемий Хабаров уонна Евдокия Николаевна Черемкина (“Теремок”), бастакы истиэпэннээх лауреат — Артем Артамонов уонна Надежда Егоровна Черова («Сказка») буоллулар. Гран-при үрдүк аатын Аделия уонна Афанасий Афанасьевич Слепцовтар (Индигир) ылан кыайыы өрөгөйүн туттулар. Көрөөччү биһирэбилин Наина Скачковская уонна Альбина Пахомовна Слепцова ыллылар. Индигир нэһилиэгин администрациятын бирииһэ Эмилия Никулинаҕа уонна Айталина Васильевна Хабароваҕа (Соболоох) тигистэ. Күрэх түмүгүнэн “Лучший руководитель” анал аат Прокопий Евгеньевич   Скрыбыкиҥҥа ананна.

Ити курдук куонкурус үрдүк таһымнаахтык ааста. Күрэҕи уһуйаан иитээччилэрэ Анна Егоровна Слепцова уонна Екатерина Константиновна Коркина хомоҕой тылынан салайан ыыттылар. Тэрээһин кэмигэр уһуйаан үлэһиттэрэ ылбаҕай ырыанан, тэтимнээх үҥкүүнэн эҕэрдэлээтилэр.  Сахалыы сиэринэн, ыраахтан-чугастан кэлбит ыалдьыттарын уһуйаан үлэһиттэрэ итии астаах, сылаас чэйдээх көрүстүлэр. Муусука алыптаах киэһэ уһуйааччыларга, иитээччилэргэ иитэр-үөрэтэр үлэлэрэ өссө ситиһиилээх, үтүө түмүктээх буоллун диэн алгыһынан түмүктэннэ.


Айталина Николаева.