Култуура десана Дьааҥы улууһугар ыалдьыттаата

Бу күннэргэ “Гарпан” этнокултуурунай киин үлэһиттэрэ нэһилиэк талааннаах ыччаттарын кытары ыаллыы Дьааҥы улууһугар култуурунай-методическай десант ыытан кэллилэр. Бу туһунан сиһилии култуура салайааччыта Степан Слепцов сырдатта.

«Олунньу 14 күнүгэр, бээтинсэҕэ “Гарпан” этно-култуурнай киин Түгэһиир нэһилиэгин талааннаах ыччаттарын илдьэн Верхоянскай куоракка култуурунай-методическай десант быһыытынан баран кэллибит. Дьиҥэ, бастакы былаан быһыытынан «Генулчал” этно-фольклорнай бөлөҕү илдьэн, билиһиннэрэр, көрдөрөр сыаллаах-соруктаах этибит. Кэккэ биричиинэнэн бу бөлөхпүт сатаан барбатылар, ол иһин бэрт кылгас кэм иһигэр талааннаах ыччаттарбытын илдьэн кэнсиэрдэттибит, ону таһынан араас тэрээһиннэри ыыттыбыт.

Ол курдук, маҥнайгы күн Верхоянскай куоракка тиийэн кэнсиэрдээтибит уонна доҕордоһуу киэһэтин ыыттыбыт. Дьоро киэһэбитигэр улуус олохтоохторо бэйэ-бэйэлэриттэн истиһэннэр, Остуолба, Дулҕалаах нэһилиэктэриттэн, Баатаҕайтан көрөөччүлэр анаан-минээн айаннаан кэлбиттэрэ биһигини олус долгутта, үөртэ.

Нөҥүө күн нэһилиэнньэҕэ сандал күммүт көрсүүтүн сиэрин-туомун ыыттыбыт. Дьон сүрдээҕин сиэри-туому ыытыыны интэриэһиргээн кэлбиттэрэ.

Салгыы СӨ норуотун уус-уран оҥоһуктарын маастара Туйаара Колесова иҥиир сабы хатарыы уонна хатыы, «Гарпан” ЭКК үлэһитэ Мария Аммосова таба уҥуохтарыттан, тириилэриттэн оҥоһуктарга маастар-кылаас ыыттылар. Маастар-кылаастарга дьон бөҕө кэлбиттэрэ интэриэс үрдүгүн көрдөрдө, олус сэргээн иһиттилэр, көрдүлэр.

Биһиги, икки ыаллыы улуус култууратын үлэһиттэрэ, Верхоянскай куорат кулуубуттан уонна Баатаҕайтан култуура салалтатыттан мустаммыт атах тэпсэн олорон Дьааҥы улууһун култууратын сүрүн кыһалҕалара уонна инники сайдар хайысхалара диэн төгүрүк остуол ыыттыбыт, сүрдээх дириҥ ис хоһоонноох, олуктаах кэпсэтии ыытылынна диэн бэлиэтиэм этэ. Онон сыалбытын-сорукпутун сүрдээҕин диэн ситиһэн, барытын толорон кэллибит,” – диэн Степан Степанович кэпсээтэ.

Сардаана Копырина