Чуольэ дьии паадьэдуо (wадун караwаал)
Чуольэ дьии паадьэдуо пуриэ лэwнурэҥ мэ саҕаальэнь. Пөмниир
йуодьинулльэнь. Моорхуонь, ах ньоронбуриэҕат ньамучэндьэ, кичилги эл
курульуодьэ чамуодьэ йэрэгуу өрдьэдэҕа тудэ льэлҕанэ курильиим.
Хадуҥнааҕарун кэлуйуол ҥоллэҥ эл лэйрии, энгэнэҥ чаwричиильэнь.
Хадьир, таат мираанурэҥ, йэрпэйэҥинь өрньэй:
– Мэт нимэ холльэ?
– Пуриэ пойуонь, эличчиэ саҕуойинук! Мэт тэтул эл чаахастэйэҥ. Мэт
лачиндьуо wайи wэрwэй, – молльэнь йэрпэйэҥ, аҕальwэрэҥ. – Энгэнэҥ
пуриэҥинь тэт йуо эл тадинунтэйэк!
Йалҕилҥинь өрньэй, мондэҥ:
– Мэт нимэ холльэ?
– Пуриэ пойуонь, эличчиэ саҕуойинук! Мэт лаwйэ альуолгин кичилэк эл
лаwйэбуньиэйэк. Мэт лаwйэ пойуонь, – молльэнь йалҕил. – Пуриэҥинь
энгэнэҥ эл курэлэйнунтэйэк.
Ибалҥинь өрньэй, мондэҥ:
– Мэт нимэ холльэ?
– Пуриэ пойуонь, эльи саҕуойинук! Чаахарэйрэ, мэт ибан сальҕарии
тудуруунэҥ пугэкиэтэйэк, – молльэнь ибал. – Пуриэҥ эл таҥудунунтэйэк!
Сукундаwаҥинь өрньэй:
– Мэт нимэ холльэ?
– Пуриэ пойуонь, эличчиэ саҕуойинук! Эл чаахарэйсэччэҥ, мэт тиwэн
лаwйэ wайидэ пугэч.
Илийэҥинь өрньэй:
– Мэт нимэ холльэ?
– Пуриэ пойуонь, эличчиэ саҕуойинук! Мэт аҕарэ мэ моойт, эл
чаахарэйсэччэҥ тэтул.
Паадьэдуо оориньэрэҥ аҕуодаҕанэҥ, өйэгэлэҥ көчэгэрэҥ кэлульэлул.
– Хуодиир оориньэк, махльуо? – молльэнь.
– Мэт нимэ саҕусэмэҥ, – мони паадьэдуо.
– Йэwлугэ! – молльэнь өйэгэ. – Тэн чумур йэклиэ льэй!
Тадаат өйэгэ мэ кэwэйльэнь. Паадьэдуо лайҕудэҥ уунудаҕа, монха
лааҕарут ньаwньиклиэлэҥ, лахил тудиэрэҥ, кэлульэлул.
– Хуодиир оориньэк, мархиль? – молльэнь.
– Мэт нимэ саҕусэмэҥ, – мони паадьэдуо.
– Йэwлугэ! – молльэнь ньаwньиклиэ. – Тэт киэйиэ тэт нимэ льэй! Хойл
митинь wиэйуол лэгулги энгэнэҥ эл лэwнулльэк!
Паадьэдуо уунудаҕанэҥ хайчиэтэгэлэҥ кэлульэлул.
– Мэт уодуо, хуодиир оориньэк? – молльэнь.
– Мэт нимэ саҕусэмэҥ, – мони паадьэдуо.
– Йэwлугэ! – молльэнь хайчиэтэгэ. – Тэт киэйиэ тэт нимэ льэй! Хойл
митинь wиэйуол лэгулги сукинь курчиил гитньэр эл лэwнулльэк!
Паадьэдуо чаманэҥ оориньаанаальэнь. Тадаат, лэйриидаҕанэ:
морхилэндьэ пуриэчээҕа худуолльэнь! Лэйтэйдаҕанэ: нимэги ньаачэгин
ҥидьиэ, чумур пурэ курульуолльэнь!
Миринь таҥниги лэйтэйльэлум: ах пуриэ лэгур мэ йандуульэнь.
Нуҥниньир мэ саҕальэнь.
Тудэ нимиэнь уурэлэк йаwнуо ньиэдьильэлум. Тадаат гитньэр моннунҥи
йаwнай чииҥинь:
– Пуриэҥ энгэнэ лэwйэ көдэн чуҥдэги моньумунунҥи. Таатльэр
маархуонь уо дитэ оориньэлэ курильиимэлэ.
Записал С.Н. Курилов в 1959 г. в Нижнеколымском районе ЯАССР.
