Йэрпэйэ мэ йэдэч!

Мит лэwэйнбурубэ wэдьиэ мэ мөндьэйнуй. Йуорпурэ саҕанэй чииҥинь йэрпэйэдигийэ йэдэйлги — чама пуҥуолэҥ. Хандьэмэ йуодэwчэ киндьэҕат хуруул чайлэрнаануни, эльин йөкэ хуруулньэҥ лукул чарилэҕан ньамучэрэйнуни, тадаат йэрпэйэдигийэ курульуотэй, таҥун лайаат — йэрпэйэ йэдэйнуни! Молилэдэ, молийии, мит Улуруо йуорпурэ чичиркинь йэрпэйэ подьаҕаатэй, Андрюшкиноҕа саҕанэй чии йуодииҕа пуҥуол чайлэ пойумутэй. Йаwнэй эндьэрукун ханчэ хандьэмэ мэр уучиинуй монур чаманэҥ пуҥуолҥи, йэрпэйэ пугудьэлэ кэчим,чуоҕаймэ эйуокэ гурчич.

Йэрпэйэ

Мит йэрпэйэ

Wарайнэҥ

Эгуорэлэк чэнгуриэй!

Лукул бурэ

Wэрwэйнэҥ

Чаҕадьэлҥинь таат куриэй.

Таатльэр уудэк

Мэ хаwдэҥ

Йахталбуньи мэт аҥа.

Таат йахтэлэ

Йэрпэйэ

Мөрилбуньи, йуодаҕа!      

Улуро Адо