Якутия КМНС Ассоциацияҕа хуончайлэпэн план мэтуҥа

ИЛКЭН. Маалайлаклисчэ лаwйэмэ ладьин мольҕалҕа Чаwлааҕар Нимэҕа Республикэн Саха (Якутия) Ассоциацияги wаҕариил алҕамлань омопэн Координационнэй собиэт солҕидьэ уучич.
Ассоциация мэтул, нэмэ Координационнэй собиэт чии туҥ сукунмольҕал тадаат идараҥҕа йалаклисчэ квартал чаҕадьэлпэн план мэтуҥа.

Ассоциация Президент Константин Роббек кэлуйуол хуончайлэпэлэк ньиэдьил: омопэн мэмдэл йаангуниль имдалдьань сукун мэдьуолуол чайлэ тадаат кин куниль имдалдьань сукун республиканскэй газета “Илкэн” wиэйуол. Туҥ хуончайлэпэдаҕа организационнэй комитет солҕаҕайтэҥа тадаат мэмдэлпэн план wиэйуотэҥа.

Исэ мэмдэлпэ: ньаачэд-онопэн киисэл, ДПИ тадаат йадархан мастер-класспэ; чуольэдьиин ньидьилэк курильиил чииньэҥ омопэн творчество аwйааҕар, гуманитарнэй исследованияпэн тадаат Чаwлааҕар алҕамлань омопэн Институт СО РАН учёнайпэньэҥ круглый стол; лохоҕойл иимидьиэл фестиваль; художникпэн чаҕадьэлпэн киисэл; чаахан фестиваль льэтэл.
Омоньэй ассоциацияпэн лэмльэпэҕа титтэ чуҥдэпэ мэмдэлпэн планҕа сэwрэстэҥа, хади куниль эльилльэсчэ – куниль йалаклисчэ хандьэмэ сэрбэдамун киндьэҕа уутэл.

Wаай Якутскҕа хандьэмэ сэрбэдамун ордьаҕа Россия тадаат Якутия эрпэйэн уул льэтэл. Танут эрпэйэн Союз лэмльэн заместитель Екатерина Кривошапкина мони. Якутиян эрпэйэн уулҕа куниль йалмэсчэ райуонпэҕат кин делегатпэ льэтэҥа. Россиян эрпэйэн съезд Магаданскэй областҕат Хабаровскэй лукулҕат, Чукоткаҕат, Камчаткаҕат тадаат Сахалинҕат эрпэйэпэ мэ солҕаҕайтэҥа. Эйуокэн мөрдэрул, нэмэ Россиян эрпэйэн Союз лэмльэ Борис Хааков лаайнулҕа эwльикиэл. Тудэл кин тысяча куниль маалайлаклисчэ сукунҕа Магаданҕа льэмльэлэк нууҥа. Уулҕа чаҕадьэй тадаат культурнэй мэмдэлпэ льэтэл, wаай мэмдэлпэн лэмльэпэ нуутэҥа.

Кунильисчэ – куниль кийуодьисчэ хандьэмэ сэрбэдамун киндьэҕа Якутия Чаwлааҕар wаҕариил алҕамлань омопэн творчество сукунмольҕал энмун республиканскэй фестиваль «Эхо тундры и тайги» уутэл. Татьяна Соросова wарачиилньэҥ чаҕадьэй, мэтул, нэмэ хандьэмэ ниҥин хачилҕа “День первокурсника” льэтэл. Кин куниль йалаклисчэ хандьэмэ ниҥин хачилҕа республиканскэй ньиҥийиэчил «Живая энергия северных игр» льэтэл, хааличэ илwиичэн Иннокентий Яковлевич Горулин мэдьуолуол истуо чайлэҕа wиэйуол.

Пугудьэмэ ниҥин хачилҕа Салехардҕа Российскэй Федерация Йиэлгэр Восток тадаат Чаwлааҕар wаҕариил алҕамлань омопэн Ассоциация всероссийскэй съезд льэтэл. Чуоҕаймэ чальдьэдөрдьэҕа Москваҕа ВДНХҕа выставка-ярмарка «Сокровища Севера» льэтэл, туҥ чайлэпэҕа всероссийскэй Ассоциация йаангуниль имдалдьисчэ сукунмольҕал мэдьуолуол хуончайлэ льэтэл. Туҥ мэмдэлпэҕа Якутскҕат делегация льэтэл.

Аруунмөрийэ Тоенто Мария