Мэридьирэ Ньидьэрпэй сукунмольҕал! Хандьэмэ сэрбэдамун “Илкэн” газета номерҕа чуҥтэҥик

Амучэ чайлэлэк, чамаримэ чуҥдьэ чии, мит чии, wальбэпэ.

ГАУ РС(Я) “Сахапечать” республиканскэй газетэн Илкэн хандьэмэ сэрбэдамун номер пулгэрэйм.

Лэйтэйсэй, нэмэ изданиен кирийэ эвенкийскэй арууҕат “куриль” саалҕа ҥодьэҥ. Элльильэ номер республиканскэй уровеньҕа тысяча wальҕарумкуруонь истуо wальҕарумкуруодьэгуниль wальҕарумкрисчэ сукунмольҕалҕа лаwйэмэ ладьин мольҕалҕа пулгэрэйл, таат митҕа кингуниль имдалдьань сукунмольҕал льэй.

Туҥ киндьэҕа пойуодьэ амутнэҥ мубуолпэ Якутия Чаwлааҕар wаҕариил алҕамлань омопэн эдьилҕа уучич. Якутскҕа Россиян тадаат республикэн эрпэйэн съездпэ уучич. КМНС Ассоциация тудэ мэдьуолуол чайлэ – йаан гуниль имдалдьань сукунмольҕал мэдьим тадаат көнмэльэ.

Газета мөрдьэпэ йоҥотэйл, хада тит Таймырскэй рекорд курильитэймут, титтэл саамэй чамуонь чаахэлэк киwэрэҥа, хуодэҥ амаладьаачэпэ йиэлгэр райуонпэҕа чаҕадьэҥа, арктическэй регионпэ хуодэбандьэ инвестиционнэй рейтингҕа аҕуонь.

Угунэҥ, альҕан лэгул Дудинкаҕа йаан истуо маалайлаклисчэ, маалайлаклисчэ килограмм льэл, туҥ лэгулҕа маалийин истуо имдалдьингуниль килограмм аwуонь чааханьии альҕа, маалийингуниль килограмм лук, кингуниль маархуонь ньаньир, йаалуонь килограмм тороньэй перец тадаат суоль льэл. уучил рекорд якутия чииҕа льэл – имдалдьидистуо омульпэҕат кидистуо маалайлукунгуниль маалайлаклань, маалайлань килограмм чааха wиэҥа. Туҥ мөрдьэ Андо Соктоев нимэльэсум.

Маалайлисчэ эрпэйэн съезд РФ субъектпэҕат чии, хадаа (кин тысяча-ҥидьиэ чии) саҕанэй, титтэ Ассоциация моойчэлэк Анатолий Слепцов нуум, тудэл мөрдьэндьэ кичил көдэ тадаат Арктикэн курильиийэ гөдэ М.К. Аммосов кирийэн СВФУҕат. Йаwнэр отчет йалаклисчэ страницаҕа чуҥтэҥик (Валентин Викторов нимэльэсиичэ).

Эрпэйэн солҕайлҕа пойуодьэ мубуопэл уучич, арууҕат, культраҕат, ураалҕат wиэнаар, тадаат чаwлааҕар чии иэруулпэ йоҕарэйрэл. Туҥ мөрдьэпэ йалмэсчэ тадаат куниль йалмэсчэ страницаҕа льэй.

«Эвены Якутии ждут перемен» заголовок алун мит регион эрпэйэн съезд чуҥтэҥик. Российскэй, республиканскэй тадаат райуоннэй былаас, тан wаай депутатпэ йаwнэй уровеньҕа, республикаги КМНС Ассоциация тадаат эрпэйэн Союз активистпэ Арктикэн тадаат тудэ саҕанэй чии пуругуруул пойуодьэ чаҕадьэл wиэҥа. Хуодэҥ моннумлэ, эл алҕамлань wиэйуол, wайидэ пойуодьэ маатэл.

Мэридьирэ Саудовскэй Аравияҕа, Эр-Риадаҕа ООН конференция лукул опустынивание ньиҥийиэчиилдаҕа уучич. Хуодэҥ Ирина Курилова нимэлэсум, “wаҕариил омопэ туҥ мубуолҕа пэлиэнуҥа, гражданскэй обществаҕат титтэл ньохоҕойнуҥи, таат титтэл омопэ йуөсэҥа, тан титтэл организация эл ҥодьэҥ. Идьиэ йаwнэй wаҕариил омопэн солҕидьэл кирийэҕат титтэлҕа титтэ аҥадэльил льэй, нэмэ титтэ аҥадэльил wайидэк wиэл” (стр.7).

Якутиян КМНС Ассоциация мубуол тадаат идьиэ чайлэ, тудэ мэдьуонь чайлэ мэдьим, хуончайлэн чии арууги, тан wаай хуодэҥ ассоциациян куриль wиэйуол, маалайлаклисчэ – wальҕарумкрисчэ страницаҕа ичуонуҥик. Wаай чаахэн хуончайлэ А.Е. Кулаковский кирийэн омопэн wальбил Нимэҕа уучич (16 страницаҕа).

Куниль кийуодьисчэ тадаат куниль йалмэсчэ страницапэҕа мит Якутиян тадаат Чукоткэн илэн иэруул идьэйнуҥа, республикэн хануойил нимэндьиипэн ууйиль хуодэҥ чаҕадьэй. Хуодэҥ Чукоткэн иэруучэҕа уорпэн лөлуллаҕанэ пойуодьэ поҕодэ тадитэҥа тадаат Ямалҕа «Чумовой капитал» (авторпэ Валентин Андреев тадаат Аят Сатаров) ньиэдьинуйли. Чукотскэй АО тадаат Ямало-Ненецкэй АО инвестиционнэй рейтинҕа саамэй амучэҥи (3 стр.).

Виктор Николаевич Васильев чаҕадьэл «Тунгусы Алдано-Майского и Аяно-Охотского районов чайлэҕа пулгэрэйл, туҥ нимэлэсул истуо сукунмольҕалпэ тудэ пулгэйл маам (10 стр.).

Мит wаай Чаwлааҕар, Сибирь тадаат Йиэлгэр Восток wаҕариил алҕамлань омопэнҕат йоҥотэйл нимэлэ И.Е.Спиридонова ньаачэҕат Россия ФАДН моойчэҕа И.В. Бариновҕа алданскэй эрпэйэн иэруучэн дело пулгэрэйнуй (14 стр.).

“Илкэн” газета мэньтэмк тадаат чуҥтэмк. Сайтхан, Россия Почтаҕан тадаат хади почтовэй отделениеҕан, мит редакция Печать Нимэҕан подписка wиэт

Wаай мит порталҕа кэлуҥик тадаат мөрдьэпэ нимэлэсҥик

Аудио мөндьиэк

Валентин ХОТУ

Аруунмөрийэ: Тоенто Мария