Эрпэйэн нимэлэсиичэ йуөдбуолҕа

ИЛКЭН. Кинигэн «Баргачан — душа эвенской поэзии» киисэл. Туҥ киисэл чакчандьэ нимэлэсиичэ, прозаик тадаат учебник нимэлэсиичэ Василий Спиридонович Кейметинов-Баргачан йуөдбуолҕа wиэйуолэл, омопэн wальбэ Нимэҕа кингуниль эльилльисчэ хандьэмэ йуодэwчэҕа уучич.

Кинига Василий Спиридонович маалидьэ эдьил, чаҕадьэй йаwул тадаат тудэльэ творчество ньиэдьил. Мубуол саримэпэ ньандуойнэҥ тудэльэ чаҕадьэл педагогикаҕа, литератураҕа тадаат культураҕа мидьэрпэйнэҥ курильиинуҥа, тудэльэ нотинэй аруупэ тадаат тудэльэ чакчал ньидьэрпэй wахчэпэ йоҥотэйнуҥа. Чуудэwчэпэ, wальбэпэ тадаат тудэльэ саҕанэй чии пугудьэ лайричилпэ ньиэдьиҥа, тан йахтийапэн тадаат иимидьиэчэпэн йахтэпэ тадаат иимидьиэлпэ аwйааҕар амудьэсул. Туҥ мубуол эл ах эрпэйэн омоги адуо йуөдбуолдаҕа, wаай амутнэҥ хуончайлэ йаwнэр чииҕа, кинэк Якутия Чаwлааҕар культураҕанэ амудьэнул.

Туҥ кинигэҕанэ Василий Спиридонович-Баргачан пугил Александра Давыдовна Кейметинова wиэйуонь, хади Тополинскэй ордьалал ураанубэ нимэҕа эрпэйэн арууҕанэ тадаат литератураҕанэ ураричим. Баргачан йукуолэл мархиль Ольга Васильевна Ултургашева пулгэйл кинигэҕанэ wальтэм, тудэл Манчестерскэй университетҕа профессор ҥодьэҥ.

Василий Спиридонович йалаклань аруу курильиим: эрпэйэн, wааwачэн, йохон тадаат английскэй аруупэ, хади ханьин чамуолэл сукунмольҕалҕа ураай. Тудэлҕа пойуонь wальбэпэ йаwнэй лэwэйнбэрэбэҕа льэй, таатльэр таҥ аруупэҕа пулгэй тадаат туҥ кинигэҕа пойуодьэ чуҥул чии льэтэл.

Ирина Курилова
Фото: И.Курилова
Аруунмөрийэ Тоенто Мария

Аудио мөндьиэк